Policia e Tiranës ka finalizuar me sukses operacionin e koduar “Pretendimi”, pas kallëzimit të dy shtetasve, të cilët raportuan se ishin dhunuar dhe kanosur për shkak të një konflikti pronësie.
Ngjarja
Sipas njoftimit zyrtar, L. H. dhe A. C. kallëzuan në polici se pesë shtetas i kishin sulmuar fizikisht dhe i kishin kërcënuar, me pretendimin se njëri prej tyre ishte pronari i vërtetë i një sipërfaqeje toke në zonën e Rrugës së Elbasanit – tokë për të cilën kallëzuesit deklarojnë se e kanë blerë në vitin 2021 nga një tjetër shtetas.
Të arrestuarit dhe personi në kërkim
Pas veprimeve të shpejta hetimore dhe operacionale, nga Sektori për Hetimin e Krimeve të Rënda dhe Forca e Posaçme Operacionale u arrestuan:
• E. A., 28 vjeç
• E. B., 31 vjeç
• E. T., 42 vjeç
• A. Sh., 44 vjeç
Të gjithë banues në fshatin Nikël, Krujë, dhe shokë me njëri-tjetrin.
Ndërkohë, është shpallur në kërkim shtetasi E. T., 37 vjeç, i cili pretendon pronësinë e tokës dhe dyshohet si organizatori i dhunës dhe kanosjes.
Akuza dhe hetimet
Prokuroria pranë Gjykatës së Shkallës së Parë të Juridiksionit të Përgjithshëm Tiranë ka nisur hetimet për veprën penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
Policia ka deklaruar se po punohet intensivisht për kapjen e 37-vjeçarit, si dhe për dokumentimin e plotë të ngjarjes dhe identifikimin e çdo prove që lidhet me rastin.
