Ish-deputeti i Partisë Demokratike, Ervin Salianji, i është drejtuar Gjykatës së Fierit me një kërkesë për lirim me kusht, pasi ka përmbushur mbi 2/3 e dënimit me burgim. Salianji ndodhet në burgun e Fierit që prej datës 27 shtator 2024, kur vendimi për dënimin e tij me 1 vit burg u la në fuqi nga Gjykata e Apelit dhe më pas u konfirmua edhe nga Gjykata e Lartë.
Salianji u dënua me akuzën e “kallëzimit të rremë” për çështjen e njohur si “Babale”, pas denoncimit publik ndaj Geron Xhafajt, vëllait të ish-ministrit të Brendshëm Fatmir Xhafaj. Ai dhe Partia Demokratike e kanë konsideruar këtë dënim si një vendim politik, të diktuar nga mazhoranca qeverisëse dhe jo mbi bazën e provave ligjore.
Dënim plotësues: 5 vite përjashtim nga funksionet publike
Përveç burgimit, Salianji është dënuar edhe me një ndëshkim plotësues, i cili i ndalon ushtrimin e funksioneve publike për një periudhë prej 5 vitesh. Ky kufizim mbetet në fuqi edhe nëse kërkesa për lirim me kusht miratohet nga Gjykata.
Salianji: “Jam i dënuar politik, do shkoj në Strasburg”
Në reagimet e tij publike, Salianji është shprehur se është një i dënuar politik, dhe ka njoftuar se do ta çojë çështjen për ankimim në Gjykatën Europiane të të Drejtave të Njeriut në Strasburg, duke e konsideruar procesin ndaj tij të pambështetur në ligj dhe si një hakmarrje direkte nga Edi Rama dhe Fatmir Xhafaj.
Tashmë, pritet që Gjykata e Fierit të shqyrtojë kërkesën për lirim me kusht në ditët në vijim, në përputhje me legjislacionin penal dhe praktikën e ndjekur për të dënuarit që kanë kryer pjesën më të madhe të dënimit të tyre.
