29 maj 2025 – Një valë e re e Covid-19 po përhapet globalisht, ndërsa varianti më i fundit i virusit, LP.8.1.1, është bërë dominues si në Shtetet e Bashkuara, ashtu edhe në shkallë botërore. Sipas Organizatës Botërore të Shëndetësisë (OBSH), ky variant është përgjegjës për një rritje të ndjeshme të rasteve, veçanërisht në rajonet e Mesdheut Lindor, Azisë Juglindore dhe Paqësorit Perëndimor.
OBSH e ka kategorizuar LP.8.1.1 si një “variant nën monitorim”, duke theksuar se rreziku për shëndetin publik në nivel global mbetet i ulët. Deri në mesin e majit, ky variant përbënte afërsisht 11% të mostrave të sekuencuara, ndërkohë që vaksinat ekzistuese pritet të mbeten efektive kundër tij.
SHBA ndryshon qëndrim për vaksinimin te fëmijët dhe gratë shtatzëna
Në një lëvizje të papritur që ka ngjallur debat, Sekretari i Shëndetësisë së SHBA-së, Robert F. Kennedy Jr., deklaroi të martën se vaksinat kundër Covid-19 nuk rekomandohen më për fëmijët e shëndetshëm dhe gratë shtatzëna. Ky vendim ka hasur në kundërshtime të forta nga ekspertët e shëndetit publik, të cilët paralajmërojnë për pasoja të mundshme në përballimin e pandemisë.
Rritje e rasteve në disa shtete amerikane
Kontrolli i udhëtarëve në aeroporte amerikane ka konfirmuar praninë e variantit LP.8.1.1 tek personat që kanë udhëtuar nga rajonet e prekura, me raste të identifikuara në Kaliforni, Uashington, Virxhinia dhe Nju Jork.
OBSH vëren se disa vende të Paqësorit Perëndimor kanë raportuar rritje të rasteve dhe shtrimeve në spital, por deri më tani nuk ka prova që ky variant shkakton një formë më të rëndë të sëmundjes, krahasuar me variantet paraardhëse.
