Tiranë, 29 maj 2025 – Nga jashtë ambienteve të Kuvendit, kreu i Partisë Demokratike, Sali Berisha, ka ritheksuar prioritetin strategjik të opozitës shqiptare: rikthimin e votës së lirë si themel i demokracisë, në një vend që ai e përshkroi si të kapur nga kartelet kriminale.

“Strategjia e Opozitës është përfaqësimi i kauzës së drejtë të shqiptarëve për votën e lirë,” – deklaroi Berisha para gazetarëve.

Duke folur me tone të forta kundër qeverisë aktuale, ai e cilësoi situatën politike si një regjim të një “narkoshteti”, ku sipas tij, “kartelet më të fuqishme në Europë” kanë kapur kontrollin e institucioneve dhe të procesit zgjedhor.

“Ka vetëm një strategji, ka vetëm një objektiv: rikthimin e votës së lirë të shqiptarëve në kushtet e një narkoshteti të dominuar tërësisht nga kartelet më të fuqishme në Europë”, – u shpreh Berisha.

Deklarata e tij vjen në një kohë kur tensionet mes mazhorancës dhe opozitës janë intensifikuar, ndërsa kërkesat për reformë zgjedhore dhe garantimin e proceseve të ndershme janë rikthyer si temë qendrore në diskursin politik.