TIRANË – Shqipëria duhet të miratojë brenda datës 30 qershor 2025 një paketë prej dhjetë ligjesh thelbësore, në mënyrë që të përfitojë 27 milionë euro mbështetje buxhetore nga Bashkimi Evropian në kuadër të Facilitetit për Reforma dhe Rritje (Reform and Growth Facility).

Kjo shumë financiare është pjesë e një pakete më të madhe, që kap vlerën e 922 milionë eurove kredi dhe grante për Ballkanin Perëndimor dhe Shqipërinë, të cilat janë të lidhura ngushtë me përmbushjen e reformave të përcaktuara në Agjendën Kombëtare të Reformave 2024-2027.

Ministri i Brendshëm, Taulant Balla, në një deklaratë për mediat, bëri me dije se miratimi i këtyre ligjeve është kusht i domosdoshëm për disbursimin e fondeve dhe për të vazhduar procesin e integrimit europian.

“Në kuadër të Agjendës së Reformave, Shqipëria ka marrë përsipër të përmbushë një set reformash legjislative dhe institucionale, ndër të cilat janë dhjetë projektligje që duhet të miratohen brenda 30 qershorit,” tha Balla.

Ligjet kryesore që presin miratim janë të përqendruara në sektorë kyç të ekonomisë dhe drejtësisë, si:
• Dy ligje në bujqësi për shëndetin e bimëve dhe shëndetin e kafshëve, të përafruara plotësisht me standardet e Bashkimit Evropian.
• Dy ligje në sektorin e energjisë për energjinë e rinovueshme nga biomasa dhe për performancën energjetike të ndërtesave.
• Ligji për ngritjen e Zyrës së Rikuperimit të Aseteve, një nismë kyçe në luftën kundër krimit të organizuar dhe sekuestrimin e pasurive të fituara në mënyrë të paligjshme.

Miratimi i këtyre ligjeve, thekson Balla, nuk është vetëm një detyrim financiar, por edhe një tregues i angazhimit serioz të Shqipërisë për avancimin e reformave evropiane dhe rrugëtimin drejt anëtarësimit në Bashkimin Evropian.

Sipas planit të negociatave me BE-në, Shqipëria ka hapur deri tani 24 nga 33 kapitujt e bisedimeve, me synimin që të përmbushë kriteret për anëtarësim deri në vitin 2030.

Megjithatë, për të përparuar në fazën e mbylljes së kapitujve kyç të drejtësisë dhe sigurisë, vendi duhet të plotësojë kushtet e ndërmjetme që përfshijnë reforma ligjore dhe institucionale në fushat e sundimit të ligjit, luftës kundër korrupsionit dhe krimit të organizuar.

“Miratimi i ligjeve dhe përmbushja e angazhimeve ndaj Bashkimit Evropian do të hapë rrugën për një periudhë të re mbështetjeje financiare dhe zhvillimi ekonomik për Shqipërinë, si dhe për një sistem drejtësie më të fortë dhe më transparent,” tha Balla.

Afati i 30 qershorit shihet si test i vështirë për qeverinë dhe Kuvendin, duke qenë se vonesat në miratimin e ligjeve mund të pengojnë jo vetëm disbursimin e fondeve, por edhe të ngadalësojnë ndjeshëm procesin e integrimit europian.