Skafistët e penduar Mariglen Shusha dhe Donial Drolli, janë të njëjtët që kanë rrëfyer gjithçka dinin, edhe me fakte, edhe për ish zv.drejtorin e Policisë së Vlorës, Ilirjan Balla. Ky i fundit do të dalë para gjykatës këtë të dielë, bashkë me 17 të arrestuarit e tjerë të operaiconit “Shpirti”, për t’u njohur me masën e sigurisë.

Drolli dhe Shusha kanë deklaruar se kreu i bandës së trafikantëve, që e quanin shkurt “Lani”, dhe njihet si Ilirjan Zaimi alias Duçollari, kishte garanci e lidhje të forta në policinë e Vlorës për të kryer aktivitetin kriminal të trafikut të drogës nga Shqipëria drejt Italisë.

Të penduarit dhe bashkëpunëtorët e drejtësisë, kanë deklaruar se Ilirjan Balla, jepte garanci për pjesën tokësore të trafikut, pra nga kultivimi, magazinimi deri në momentin kur pakot me lëndë narkotike niseshin me skafe.

Ndërkohë, sipas Drollit dhe Shushës, zv. drejtori i Policisë së Vlorës ka qendruar bashkë me prokurorin Maksin Sota në shtëpinë me qira që paguhej nga Ilirjan Duçollari.

Mësohet se janë dhjetra përgjime e vëzhgime e foto të siguruara nga i penduari Shusha, gjithashtu i përfshirë në trafik droge e arrestuar nga italianët që sipas prokurorisë së Posaçme, SPAK, konfirmojnë faktin që Ilirjan Balla, ishte një ndër mbështetësit kryesorë e garantonte cështjen e trafikut të drogës.