Arjan dhe Lorenco Talhellari, babë e bir, kanë rënë në prangat e Policisë së Shtetit, pas disa javësh në kërkim për kanosje me armë zjarri dhe mbajtje pa leje të armëve. Ngjarja, e cila ndodhi në fund të prillit, mori kthesë të re pas arrestimit të të atit më 18 maj dhe ndalimit të djalit të tij sot.

Sipas burimeve të policisë, konflikti kishte si motiv bastet sportive dhe ka nisur pas një sherri verbal mes Lorenco Talhellarit dhe një shtetasi tjetër, Lendi Palaj. Situata ka agravuar kur në ndihmë të të birit ka ndërhyrë Arjan Talhellari, i cili është shfaqur me armë në dorë, një automatik që ngjan me modelin “Skorpions”.

Fatmirësisht, Arjan Talhellari nuk ka mundur të bëjë qitje pasi, sipas hetimeve, fishekët i kanë rënë në tokë, duke shmangur përshkallëzimin e situatës në pasoja më të rënda.

Policia bën me dije se gjatë këqyrjes së vendit të ngjarjes janë gjetur dy fishekë dhe është konstatuar dëmtim i xhamave të një zyre elektorale, çka dyshohet të jetë pasojë e incidentit.

Ngjarja ndodhi rreth orës 14:00, ndërsa tashmë Arjan dhe Lorenco Talhellari përballen me akuzat për “Mbajtje pa lejë të armëve” dhe “Kanosje me armë”, teksa hetimet për zbardhjen e plotë të rrethanave vijojnë.