Një ngjarje tronditëse ka ndodhur në qytetin Baikalsk, në rajonin Irkutsk të Siberisë, ku pesë adoleshentë humbën jetën dhe katër të tjerë mbetën të plagosur në një sulm me thikë.

Sipas raportimeve të agjencisë Tass dhe njoftimit zyrtar të departamentit të policisë, sulmi ndodhi brenda një banese ku ishin mbledhur disa të rinj. Hetuesit konfirmuan se trupat e pesë viktimave të mitura u gjetën në vendngjarje, ndërsa katër të tjerë u dërguan me urgjencë në spital me lëndime të rënda.

Sipas të dhënave paraprake, autori i dyshuar, një nga adoleshentët pjesëmarrës në tubim, ka sulmuar papritur shokët e tij me thikë, duke shkaktuar viktima dhe të plagosur. Më pas, ai ka vënë zjarr në shtëpi, ku edhe ka humbur jetën, duke mos i mbijetuar flakëve.

Motivet e ngjarjes mbeten të paqarta, ndërsa autoritetet kanë nisur një hetim të thelluar për të zbardhur rrethanat e tragjedisë. Sulmi ka tronditur jo vetëm komunitetin lokal, por edhe mbarë opinionin publik rus.

Ky është një nga aktet më të rënda të dhunës mes të rinjve në Rusi vitet e fundit. Autoritetet pritet të japin më shumë detaje në vijim.