Tirana pritet të pasurohet së shpejti me një tjetër simbol të arkitekturës moderne – “Barcelona Tower”, një ndërtesë e re ikonike që do të ngrihet në zemër të qytetit, në vendin ku aktualisht ndodhet Banka Kombëtare Tregtare, pranë Shtëpisë së Gjetheve.

E projektuar nga studioja e famshme spanjolle “Ricardo Bofill Taller”, e njohur për ndërtesat e saj unike në të gjithë botën, kjo kullë do të jetë ndër më të lartat në vend, duke arritur në një lartësi prej 192.8 metrash dhe duke numëruar 50 kate mbi tokë e 6 kate nëntokë.

Me një strukturë tërësisht prej betoni në ngjyrë tulle, “Barcelona Tower” do të spikasë jo vetëm për përmasat, por edhe për stilin e saj arkitektonik modern, që do të kontrastojë me ndërtesat e trashëgimisë që e rrethojnë.

Kulla do të ngrihet ngjitur me “Green Tower Forever”, përballë Gjykatës, në një zonë që po kthehet me shpejtësi në një nga epiqendrat urbane më dinamike të Tiranës. Ajo vjen menjëherë pas “Lana Riverse Residences” dhe renditet e dyta për nga lartësia në Shqipëri, duke i dhënë kryeqytetit një tjetër element në profilin e tij gjithnjë e më të guximshëm.

Ndërtimi i “Barcelona Tower” konsiderohet nga specialistët si një hap i madh drejt transformimit arkitektonik të Tiranës, por gjithashtu ka nxitur diskutime për ruajtjen e trashëgimisë kulturore, duke qenë se ndodhet shumë pranë Shtëpisë së Gjetheve, një ndër simbolet më të rëndësishme të kujtesës historike kombëtare.

Projekti pritet të nisë së shpejti dhe do të shërbejë si hapësirë multifunksionale, ku do të ndërthuren banimi, biznesi dhe shërbimet, në përputhje me modelin e qyteteve evropiane.

Tirana po ngjitet lart – dhe me “Barcelona Tower”, ajo jo vetëm që do të fitojë një tjetër rekord në lartësi, por edhe një pjesë të re të identitetit të saj bashkëkohor.