Korschenbroich, Gjermani – Një ngjarje tragjike ka tronditur komunitetin e qetë të Korschenbroich këtë të shtunë, kur një avion i vogël është rrëzuar mbi një shtëpi banimi, duke shkaktuar dy viktima, mes tyre edhe pilotja 71-vjeçare.

Sipas të dhënave paraprake të raportuara nga e përditshmja “Bild”, pilotja kishte lajmëruar qendrën e kontrollit për probleme me motorin pak para përplasjes fatale. Avioni nuk mundi të mbante fluturimin dhe ra direkt mbi tarracën e një ndërtese njëkatëshe, duke e shkatërruar pjesërisht.

Një nga fqinjët, dëshmitar i ngjarjes, ka përshkruar momentet e tmerrit:

“U dëgjua një shpërthim shumë i fortë dhe menjëherë pashë tymin që kishte mbuluar banesën. Vrapuam drejt shtëpisë për të ndihmuar. Fqinji im e kishte parë avionin duke rënë dhe arriti të dilte nga shtëpia, ndërsa gruaja e tij vdiq.”

Ende nuk është konfirmuar zyrtarisht nëse viktima e dytë është banore e banesës ku ndodhi përplasja. Ndërkohë, autoritetet gjermane kanë nisur hetimet, ndërsa një njoftim zyrtar pritet të publikohet së shpejti nga policia e landit të Nordrhein-Westfalen.

Zjarri i shkaktuar nga rrëzimi është vënë nën kontroll nga zjarrfikësit, ndërsa forca të shumta policore dhe ekipe emergjence kanë rrethuar zonën dhe po punojnë për zbardhjen e plotë të shkaqeve.

Ngjarja ka lënë të tronditur banorët e lagjes, ndërsa komuniteti është mbledhur për të shprehur solidaritetin dhe dhimbjen për viktimat e kësaj tragjedie ajrore.