Tiranë, Kryetari i Partisë Demokratike, Sali Berisha, në një konferencë për mediat, ka prezantuar rezolutën e dytë të organizatës ndërkombëtare të qendrës së djathtë IDC-CDI, duke e cilësuar atë si një akt që “rrëzon farsën e 11 majit” dhe denoncon hapur shkeljet në procesin zgjedhor të zhvilluar në Shqipëri.

Berisha u ndal fillimisht te rëndësia e dy rezolutave të miratuara nga kjo organizatë ndërkombëtare:

“Është e vërtetë që kjo është rezoluta e dytë, e para është në tetor. Rezoluta e parë e paralajmëron farsën me të gjithë shëmtinë e saj. Rezoluta e dytë bazohet në raportet e institucioneve ndërkombëtare pas zhvillimit të farsës, dhe kjo rezolutë me fakte konkrete denoncon shkeljen e parimeve ndërkombëtare të zgjedhjeve të sanksionuara në dokumente ndërkombëtare,” deklaroi Berisha.

Duke e krahasuar këtë qëndrim me rezolutën e Valencias të miratuar më 30 prill, Berisha shtoi se ajo ishte hartuar në fund të fushatës zgjedhore, ndërsa rezoluta e re, e IDC-CDI, konkludon mbi zhvillimet post-zgjedhore dhe i cilëson qartazi zgjedhjet si një farsë.

“Kjo konkludon siç kishte paralajmëruar se u zhvillua në Shqipëri një farsë elektorale. Çfarë tregon kjo? Kjo tregon se prozhektorët e komunitetit ndërkombëtar, të organizatave partiake politike janë non stop mbi Shqipërinë, narkoshtetin shqiptar.”

Me këtë deklaratë, Berisha synon të forcojë pozicionin e Partisë Demokratike në kundërshtimin e procesit zgjedhor të 11 majit, duke theksuar se vëzhgimi dhe reagimi ndërkombëtar ndaj fenomeneve të korrupsionit dhe manipulimit në zgjedhje po bëhet gjithnjë e më i hapur dhe i drejtpërdrejtë.