Ukrainë – Ushtria ukrainase ka realizuar një sulm të suksesshëm me dronë në një bazë ajrore strategjike ruse, duke shkaktuar dëme të konsiderueshme dhe shkatërruar dhjetra avionë ushtarakë, përfshirë bombardues dhe luftarakë, sipas raporteve nga terreni.

Operacioni, i koduar “Rrjeti i Merimangës”, kishte si objektiv kryesor bazën ajrore në Olenya, një prej pikave kyçe të forcave ajrore ruse, që ndodhet rreth 1800 kilometra larg Ukrainës. Sipas burimeve, vetëm në këtë bazë janë shkatërruar dhjetëra avionë, përfshirë modele të rëndësishëm si A-50, Tu-95 dhe Tu-22, me dëme që vlerësohen të kalojnë 2 miliardë dollarë.

Në dy ditët e fundit, mediat raportuan se ushtria ruse kishte transferuar në Olenya një flotë avionësh bombardues dhe transporti, duke e bërë bazën një objektiv prioritar për sulmet ukrainase. Përveç Olenyas, edhe dy baza të tjera ajrore në Ivanovo dhe Dyagilevo raportohet se janë goditur në kuadër të këtij operacioni të koordinuar.

Ky sulm me dronë tregon një avancim të rëndësishëm në aftësitë sulmuese të forcave ukrainase, duke goditur thellë kapacitetin ushtarak rus dhe duke ndikuar në balancën e forcave në luftën që vazhdon mes dy vendeve.

Operacioni “Rrjeti i Merimangës” përbën një goditje të rëndë për Moskën, duke shënuar një nga sulmet më të mëdha të njohura deri tani kundër bazave ajrore ruse gjatë konfliktit. Autoritetet ukrainase kanë njoftuar se do të vazhdojnë me operacione të tjera strategjike për të dobësuar kapacitetet e armikut.