Zëdhënësja e Shtëpisë së Bardhë, Karoline Leavitt, deklaroi se Presidenti Donald Trump është i vendosur që të çojë palët në konfliktin Rusi-Ukrainë drejt tryezës së bisedimeve, duke theksuar se “lufta duhet të përfundojë tani”.

Duke folur në një konferencë për shtyp në kopshtin e Shtëpisë së Bardhë, Leavitt u ndal tek zhvillimet e fundit dhe tek bisedimet mes Rusisë dhe Ukrainës të mbajtura në Stamboll, të cilat ajo i konsideroi si rezultat i përpjekjeve të vazhdueshme të presidentit Trump për të gjetur një zgjidhje diplomatike.

“Presidenti dëshiron që të dy udhëheqësit dhe të dyja palët të ulen në tryezë, dhe sot ne pamë se ata e bënë këtë me këmbënguljen e Presidentit Trump,” u shpreh Leavitt. “Por mendimet e presidentit mbi këto bisedime dhe ato që janë përjetuar atje do t’ia lë atij.”

E pyetur për reagimin e saj lidhur me sulmin e Ukrainës me dronë ndaj territorit rus, Leavitt theksoi nevojën urgjente për t’i dhënë fund konfliktit.

“Kjo luftë tani duhet të përfundojë. Ka qenë brutale për të dyja palët dhe shumë njerëz kanë humbur jetën. Presidenti dëshiron që kjo luftë të përfundojë në tryezën e negociatave,” tha ajo.

Deklaratat e Leavitt vijnë në një kohë kur tensionet në fushën e betejës janë përshkallëzuar, ndërsa përpjekjet për ndërmjetësim kanë mbetur të zbehta. Kjo sinjalizon një rritje të interesit të administratës Trump për të luajtur një rol aktiv në ndalimin e luftës, përmes presionit diplomatik dhe kontakteve ndërkombëtare.