Një ngjarje e rëndë ka ndodhur mëngjesin e sotëm në kryeqytetin e Kosovës, ku një grua është gjetur pa shenja jete para hyrjes së banesës së saj.

Sipas informacioneve zyrtare, ngjarja ka ndodhur rreth orës 07:15, në rrugën “Abdurrahman Shala” në Prishtinë. Viktima është identifikuar si Luljeta Gjinovci, 64 vjeçe.

Në vendngjarje kanë mbërritur menjëherë njësitë përkatëse të Policisë dhe ekipi emergjent mjekësor, të cilët kanë konstatuar vdekjen e gruas.

Burime nga policia bëjnë me dije se, në trupin e viktimës nuk janë konstatuar shenja dhune apo ndonjë element tjetër që do të ngriste dyshime për ndonjë vepër penale.

Hetimet po vazhdojnë për të zbardhur rrethanat e plota të kësaj ngjarjeje, ndërsa trupi i pajetë i viktimës është dërguar për obduksion, me qëllim përcaktimin e saktë të shkakut të vdekjes.