Tokio – Japonia është zhytur thellë në një krizë demografike, teksa për herë të parë që prej vitit 1899, numri vjetor i lindjeve ka rënë nën kufirin prej 700 mijë. Sipas të dhënave zyrtare të publikuara këtë javë nga Ministria e Shëndetësisë, në vitin 2024 janë regjistruar vetëm 686,061 lindje, një rënie me 5.7% krahasuar me vitin paraardhës.

Kjo është shifra më e ulët e lindjeve në Japoni që nga fillimi i regjistrimit të statistikave zyrtare, ndërsa të dhënat nuk përfshijnë foshnjat e lindura nga banorët e huaj. Rënia dramatike e lindshmërisë po e shtyn vendin drejt një të ardhmeje të pasigurt demografike dhe ekonomike.

Fertiliteti në nivel rekord të ulët

Krahas rënies së lindjeve, ka rënë edhe shkalla e fertilitetit – numri mesatar i fëmijëve për një grua gjatë jetës së saj – duke zbritur në 1.15 nga 1.20 në vitin 2023. Ky tregues ndodhet shumë larg nivelit 2.1 që nevojitet për të mbajtur popullsinë stabile.

Në të njëjtën kohë, në Japoni janë regjistruar 1.6 milion vdekje gjatë vitit 2024, një rritje me 1.9% në krahasim me vitin e kaluar, duke përforcuar më tej bilancin negativ të popullsisë.

Martesat, rritje e lehtë në një trend afatgjatë rënës

Në një shenjë të rrallë pozitive, numri i martesave shënoi një rritje të lehtë për herë të parë në dy vjet, duke arritur në 485,063 – rreth 10,300 më shumë se në vitin 2023. Megjithatë, ekspertët theksojnë se kjo është larg mjaftueshme për të përmbysur një trend në rënie që ka nisur që nga vitet 1970. Në Japoni, lindjet jashtë martese janë ende të rralla, çka e bën numrin e martesave një faktor kritik në dinamikën e lindjeve.

Parashikime të zymta për të ardhmen

Numri aktual i lindjeve ka rënë 15 vjet më herët sesa parashikimet zyrtare të bëra nga Instituti Kombëtar i Kërkimeve të Popullsisë dhe Sigurimeve Shoqërore. Nëse ky trend vazhdon, parashikohet që popullsia e Japonisë – sot rreth 124 milionë – të bjerë në 87 milionë deri në vitin 2070, kur 40% e popullsisë pritet të jetë mbi 65 vjeç.

Në vitin 1949, Japonia regjistroi kulmin historik me 2.7 milion lindje, ndërsa në vitin 2016, shifra ra nën 1 milion për herë të parë. Në vitin 2022, numri i lindjeve zbriti nën 800 mijë dhe tani, dy vite më pas, ka zbritur edhe më poshtë.

Masa urgjente për të frenuar krizën

Përballë kësaj situate alarmante, kryeministri Shigeri Ishiba e ka cilësuar fenomenin si një “emergjencë të heshtur” dhe ka prezantuar një sërë masash për të nxitur lindjet. Paketa përfshin:
• Zgjerimin e ndihmës financiare për fëmijët
• Arsim të mesëm falas për të gjithë
• Garanci për 100% të pagës për çiftet që marrin leje prindërore në të njëjtën kohë

Megjithatë, kritikët theksojnë se për të qenë efektive, këto masa duhet të shoqërohen me ndryshime kulturore thelbësore në balancimin e jetës profesionale me atë familjare, si dhe një sistem më mbështetës për gratë dhe të rinjtë.

Pasoja për ekonominë dhe sigurinë kombëtare

Një popullsi që plaket dhe pakësohet me ritme të shpejta përbën rrezik serioz për ekonominë, tregun e punës, sistemin e pensioneve, por edhe për sigurinë kombëtare, në një kohë kur Japonia përballet me sfida gjeopolitike në rajon nga Kina dhe Koreja e Veriut.

Krizat demografike si ajo që po kalon Japonia janë tashmë të dukshme në shumë vende të zhvilluara, por asnjë prej tyre nuk e përjeton me intensitetin dhe urgjencën e një kombi që për dekada me radhë është përballur me plakje masive, pa zgjidhje afatgjata.

Zyrtarët japonezë ndodhen tani përballë një gare me kohën për të ndalur një trend që kërcënon të transformojë rrënjësisht shoqërinë japoneze.