Mbi 1.5 milion pelegrinë nga mbarë bota kanë nisur përgatitjet finale për të filluar Haxhin, një nga ritualet më të rëndësishme dhe të shenjta të fesë islame. Ceremonia nis zyrtarisht në mbrëmjen e së mërkurës, në një klimë sfiduese të nxehtësisë ekstreme që ka tronditur rajonin vitet e fundit.

Vitin e kaluar, Haxhi u shënua nga një tragjedi e rëndë me mbi 1.000 viktima të raportuara për shkak të temperaturave përvëluese që kaluan 51 gradë Celsius. Këtë vit, autoritetet saudite kanë ndërmarrë masa shtesë për të shmangur një përsëritje të tillë, duke krijuar ambiente të mbuluara dhe zona freskimi në vendet kyçe të pelegrinazhit.

Pelegrinët, të veshur me rrobat tradicionale të bardha që simbolizojnë barazinë dhe pastërtinë, kanë filluar të kryejnë ritualet e para përreth Qabes – kubit të zi në zemër të Xhamisë së Madhe në Mekë, e cila është vendi më i shenjtë në Islam.

“Duket sikur nuk jeni në këtë botë,” – tha Khitam, një pelegrin 63-vjeçar, për agjencinë franceze AFP. “Para Haxhit, e shikoja Xhaminë e Madhe çdo ditë në televizor. Tani jam këtu me sytë e mi.”

Përpara hyrjes në qytetin e shenjtë të Mekës, besimtarët kalojnë në një fazë përgatitore të pastërtisë shpirtërore dhe fizike, duke veshur rroba të thjeshta dhe duke hequr dorë nga çdo simbol i statusit social.

Haxhi është një nga pesë shtyllat e Islamit dhe obligohet të kryhet të paktën një herë në jetë nga çdo mysliman që ka mundësi fizike dhe financiare për ta realizuar atë.

Në një deklaratë zyrtare, autoritetet saudite njoftuan se përveç masave kundër nxehtësisë, janë mobilizuar mijëra punonjës të emergjencës dhe shëndetësisë për të ndihmuar pelegrinët gjatë ditëve të ceremonisë. Ndërkohë, janë shpërndarë edhe dhjetëra mijëra shishe uji dhe ventilatorë portativë për të zbutur efektet e valës së të nxehtit.

Haxhi pritet të zgjasë disa ditë, me kulminacionin në malin Arafat, aty ku Profeti Muhamed mbajti hutben e tij të fundit, ndërsa qindra mijëra besimtarë do të luten për falje, mëshirë dhe paqe.