Një aksident rrugor u regjistrua mbrëmjen e së mërkurës në aksin Fier–Seman, në zonën e njohur si Fermë-Çlirim, ku një automjet është përplasur me një mjet bujqësor.

Si pasojë e përplasjes, tre persona kanë mbetur të plagosur dhe janë transportuar menjëherë drejt Spitalit Rajonal të Fierit. Burime nga spitali bëjnë me dije se të lënduarit ndodhen jashtë rrezikut për jetën, por mbeten nën kujdesin e mjekëve.

Në vendngjarje kanë mbërritur forcat e policisë dhe grupi hetimor, të cilët po punojnë për të zbardhur shkaqet dhe rrethanat e aksidentit.

Autoritetet nuk kanë dhënë ende detaje mbi identitetin e të lënduarve apo mbi rrethanat e sakta të përplasjes, por paraprakisht dyshohet se mjeti bujqësor nuk ishte i pajisur me sinjalistikë të mjaftueshme për qarkullimin në rrugë gjatë orëve të errëta. Hetimet janë në vijim.