Vlorë, 6 qershor 2025 – Një aksident rrugor ka ndodhur ditën e djeshme në zonën e “Lungomares” në Vlorë, ku një 78-vjeçar është përplasur nga një automjet që drejtohej nga një 31-vjeçar. I plagosuri u dërgua menjëherë në spital dhe fatmirësisht ndodhet jashtë rrezikut për jetën.

Sipas njoftimit zyrtar të Policisë së Vlorës, drejtuesi i mjetit, shtetasi T. B., banues në fshatin Kaninë, po procedohet penalisht për shkak të aksidentit që ka ndodhur në vendkalimin e këmbësorëve në rrugën “Çamëria”.

“Specialistët e Seksionit të Trafikut Urban dhe Interurban Vlorë referuan materialet në Prokurori dhe nisën procedimin penal për shtetasin T.B., 31 vjeç, pasi duke drejtuar automjetin në rrugën ‘Çamëria’, në Lungomare, ka aksidentuar në vendkalimin e këmbësorëve shtetasin K.Gj., 78 vjeç, banues në Vlorë, i cili ndodhet në spital jashtë rrezikut për jetën,” thuhet në komunikatën e Policisë.

Policia apelon për kujdes të shtuar në qarkullim, veçanërisht në zonat e vendkalimit të këmbësorëve, për të shmangur aksidentet dhe për të ruajtur sigurinë e jetës së qytetarëve.