Pika kufitare e Morinës po përjeton një rritje të ndjeshme të fluksit të hyrjeve, teksa dhjetëra mijëra qytetarë nga Kosova, Maqedonia e Veriut dhe Lugina e Preshevës kanë hyrë në Shqipëri gjatë orëve të fundit.
Arsyet kryesore për këtë fluks janë fundjava në bregdetin shqiptar dhe ndeshja e shumëpritur mes Shqipërisë dhe Serbisë, që do të luhet sonte.
Për të përballuar këtë fluks, autoritetet në doganën e Morinës kanë hapur kufirin duke shmangur kontrollet e zakonshme, në zbatim të marrëveshjes për qarkullim të lirë. Ky veprim synon të parandalojë krijimin e radhëve të gjata dhe të lehtësojë udhëtimin për qytetarët që vijnë kryesisht nga Kosova.
Rritja e qarkullimit është gjithashtu një tregues i lidhjes së fortë që qytetarët nga rajoni ndiejnë me Shqipërinë, jo vetëm për pushime, por edhe për të mbështetur Kombëtaren kuqezi në sfidat e saj ndërkombëtare.
