Një 16-vjeçar shqiptar është plagosur rëndë pas një sulmi me thikë të ndodhur mbrëmjen e së shtunës në qytetin italian të Vicenzës, në një zonë pranë qendrës historike.

Sipas mediave italiane, i mituri u godit me thikë në gjoks dhe ndodhet aktualisht në njësinë e kujdesit intensiv pediatrik të spitalit lokal. Autoritetet shëndetësore konfirmojnë se, pavarësisht plagës serioze, “jeta e tij është jashtë rrezikut”.

Autori i dyshuar i ngjarjes është një tjetër i ri, ndoshta bashkëmoshatar i viktimës. Motivet e agresionit nuk janë ende të qarta, por një nga pistat që po hetohet është tentativa për grabitje që përfundoi në dhunë. Megjithatë, hetuesit nuk përjashtojnë as arsye të tjera personale ose konflikte të mëparshme.

Alarmi u dha nga disa kalimtarë të rastësishëm, të cilët panë momentin e ngjarjes dhe lajmëruan menjëherë shërbimet e emergjencës. Ambulanca e Suem 118 mbërriti në vendngjarje dhe i dha ndihmën e parë të plagosurit, duke e transportuar më pas me urgjencë në spital.

Ndërkohë, autoritetet italiane po vijojnë hetimet dhe punojnë për identifikimin dhe kapjen e autorit të sulmit.