Tiranë, 8 qershor 2025 – Një sasi lënde piroteknike është konstatuar nga shërbimet e Policisë së Tiranës në murin rrethues të Universitetit Politeknik, gjatë kontrolleve rutinë të ditës së djeshme.

Lajmi është bërë i ditur nga Policia e Tiranës përmes një njoftimi zyrtar, ku konfirmohet se materiali i dyshimtë është sekuestruar në cilësinë e provës materiale, ndërsa grupi hetimor ka nisur menjëherë punën për të identifikuar poseduesin e lëndës piroteknike.

“Më datë 07.06.2025, në murin rrethues të Universitetit Politeknik, shërbimet e Policisë kanë konstatuar një sasi lëndë piroteknike. Lëndët piroteknike u sekuestruan në cilësinë e provës materiale. Grupi hetimor po punon për këqyrjen e pamjeve filmike, me qëllim identifikimin e poseduesit”, thuhet në deklaratën zyrtare.

Ngjarja është referuar në Prokurorinë e Tiranës për veprime të mëtejshme procedurale, ndërsa burime pranë uniformave blu bëjnë të ditur se nuk ka dyshime për ndonjë akt kriminal të menjëhershëm, por çdo pistë mbetet e hapur deri në përfundimin e hetimeve.