Mynih u trondit mbrëmjen e së shtunës nga një sulm me thikë, ku një grua 30-vjeçare plagosi disa kalimtarë në zonën e njohur të Theresienwiese – vendi ku çdo vit mbahet festivali tradicional “Oktoberfest”. Ngjarja alarmoi qytetin dhe solli reagimin e menjëhershëm të forcave të rendit.

Sipas të dhënave paraprake të publikuara nga mediat gjermane BILD dhe Abendblatt, sulmuesja u qëllua nga policia gjatë tentativës për ta neutralizuar. Ajo u transportua me urgjencë në spital, ku iu nënshtrua një ndërhyrjeje kirurgjikale, por për shkak të plagëve të marra, ndërroi jetë pak orë më vonë.

Policia gjermane ka konfirmuar se disa persona kanë mbetur të plagosur si pasojë e sulmit, por nuk ka dhënë ende një bilanc zyrtar të të dëmtuarve. Motivet e ngjarjes mbeten të paqarta, ndërsa hetimet vijojnë intensivisht për të zbardhur shkaqet dhe rrethanat.

Sipas raportimeve të BILD, ekziston dyshimi që gruaja të ketë qenë e prekur nga probleme të shëndetit mendor, megjithatë autoritetet nuk kanë konfirmuar ende asgjë zyrtare në lidhje me gjendjen psikologjike të saj.

Theresienwiese, që zakonisht është simbol i festës dhe gëzimit, këtë herë u kthye në skenën e një akti të dhunshëm që tronditi jo vetëm qytetin, por gjithë vendin. Autoritetet kanë shtuar masat e sigurisë në zonë dhe kanë kërkuar ndihmën e qytetarëve për çdo informacion që mund të ndihmojë në hetim.