Referendumi i mbajtur në Itali për lehtësimin e ligjeve të shtetësisë dhe përmirësimin e mbrojtjes në vendin e punës dështoi për shkak të pjesëmarrjes së ulët të qytetarëve, sipas të dhënave paraprake që raportoi agjencia AP.

Kjo shënon një humbje të qartë për opozitën e qendrës së majtë dhe një fitore për kryeministren Giorgia Meloni dhe koalicionin e saj të djathtë në pushtet, të cilët publikisht kishin bërë thirrje për bojkotimin e votimit.

Sipas të dhënave zyrtare nga afro 90% e qendrave të votimit, pjesëmarrja ishte rreth 30% e votuesve me të drejtë vote, shumë më poshtë pragut të nevojshëm prej 50% plus një për të shpallur referendumin të vlefshëm.

Partia e ekstremit të djathtë “Vëllezërit e Italisë”, e drejtuar nga Giorgia Meloni, përshëndeti dështimin e referendumit.

“Qëllimi i vetëm i vërtetë i këtij referendumi ishte të rrëzonte qeverinë Meloni,” shkroi partia në rrjetet sociale, duke shpërndarë një foto të drejtuesve kryesorë të opozitës. “Në fund, ishin vetë italianët që ju rrëzuan.”

Në anën tjetër, Maurizio Landini, kreu i sindikatës CGIL, e cila mbështeste nismën e referendumit, pranoi humbjen duke theksuar nevojën për reflektim.