Me rastin e 26-vjetorit të çlirimit të Kosovës, Presidentja Vjosa Osmani ka ndarë një mesazh të fuqishëm përmes një postimi në Facebook, duke rikujtuar ditën kur 50 mijë ushtarë të NATO-s zbarkuan në Kosovë dhe sollën me vete shpresën, pas një periudhe të gjatë errësire dhe dhimbjeje.
“Në këtë ditë, 26 vjet më parë, mbi tokën e djegur të Kosovës zbarkoi shpresa,” – shkruan Osmani, duke theksuar se më shumë se një milion shqiptarë u kthyen në shtëpitë e tyre.
Presidentja kujton me krenari rolin vendimtar të Ushtrisë Çlirimtare të Kosovës dhe forcave të NATO-s, të cilët, siç shprehet ajo, e kthyen tmerrin në guxim dhe dhimbjen në shpresë, duke e bërë lirinë realitet.
Në mesazhin e saj, ajo i përgjigjet edhe përpjekjeve për të rishkruar historinë:
“Pavarësisht përpjekjeve të armiqve të Kosovës për ta ndryshuar historinë, një histori e shkruar me gjak nuk mund të ndryshohet e as fshihet nga gënjeshtra të shkruara me laps.”
Osmani përmbyll mesazhin me një thirrje për krenari kombëtare dhe nderim të përjetshëm për dëshmorët, duke theksuar se Kosova e lirë, e pavarur dhe demokratike është përjetësuar nga gjaku i atyre që ranë për liri:
“Kosova e lirë, e pavarur, demokratike, e përjetshme! Sepse përjetësinë ia dhanë dëshmorët e martirët e lirisë!”
Kjo ditë, që shënon fundin e luftës dhe fillimin e një epoke të re për Kosovën, përkujtohet çdo vit si simbol i sakrificës, unitetit dhe aspiratës për një të ardhme të ndritur europiane.
