Forcat izraelite njoftuan sot në mbrëmje se janë lëshuar raketa nga Irani drejt territorit izraelit, si pjesë e kundërsulmit pas një sulmi të madh izraelit që ndodhi rreth 18 orë më parë.

Sistemet e mbrojtjes ajrore izraelite po përpiqen të bllokojnë kërcënimin raketor. Në disa zona u aktivizua alarmi ajror dhe banorët u urdhëruan të kërkojnë strehim në vendet e dedikuara.

Mediat raportojnë se janë lëshuar rreth njëqind raketa balistike nga Irani. Në Tel Aviv janë vërejtur re të mëdha tymi që ngrihen pranë qiellgërvishtësve, ndërsa nuk është ende e qartë nëse ato janë rezultat i goditjeve raketore apo i interceptimeve nga sistemet mbrojtëse.

Situata mbetet në zhvillim e sipër, ndërsa tensionet midis dy vendeve vazhdojnë të rriten.