Pas një sezoni të vështirë ku Jack Grealish u ul në stol dhe nuk arriti të siguronte vendin në formacionin bazë të Manchester City, trajneri Pep Guardiola po përgatit një riformatim të ekipit për sezonin e ri, duke përfshirë largime dhe përforcime të bujshme.

Një nga largimet më të pritura është pikërisht ai i mesfushorit anglez 29-vjeçar, për të cilin klubi kishte shpenzuar 100 milionë paundë. Grealish nuk konsiderohet më pjesë e projektit të “Qytetarëve” dhe për këtë arsye po kërkohet një destinacion i ri për të.

Interesi më i madh vjen nga Newcastle United, klubi që këtë sezon triumfoi në Carabao Cup dhe përgatitet për të debutuar në Champions League. “Qymyrxhinjtë” kanë bërë një ofertë konkrete për huazimin e Grealish me detyrim blerjeje në vlerën e 80 milionë eurove, duke sinjalizuar ambiciet e tyre për të qenë në garë për titullin në Premier League.

Bisedimet mes klubeve janë në fazë përparimi dhe pritet që marrëveshja të zyrtarizohet shumë shpejt. Nga ana e tij, Grealish duket i gatshëm të pranojë këtë sfidë të re dhe e konsideron Newcastle si mundësinë ideale për të rilindur në Premier League dhe për të rikthyer formën e tij më të mirë.