Agjencia Kombëtare e Veterinarisë dhe Mbrojtjes së Bimëve (AKVMB) ka njoftuar zgjerimin e zonave të prekura nga murtaja tek bagëtitë e imta, një sëmundje shumë ngjitëse që po kërcënon seriozisht blegtorinë shqiptare.

Sipas njoftimit zyrtar, deri më tani janë konfirmuar 7 ferma pozitive në 5 vatra shpërthimi, ndërsa krerët e infektuar po asgjësohen sipas protokolleve strikte veterinare, me qëllim ndalimin e përhapjes së sëmundjes.

AKVMB ka ndaluar tregtimin dhe lëvizjen e kafshëve të gjalla në zonat e prekura dhe u bën thirrje të gjithë fermerëve që të njoftojnë menjëherë veterinerët për çdo simptomë të dyshimtë te kafshët e tyre.

“Ky është një hap jetik për mbrojtjen e tufave dhe për ndalimin e përhapjes së mëtejshme të kësaj sëmundjeje shumë ngjitëse dhe shkatërruese për blegtorinë,” theksohet në deklaratën zyrtare të AKVMB.

Veterinerët ndodhen në terren me gatishmëri të plotë, duke kryer mostrime laboratorike dhe monitorim të vazhdueshëm të gjendjes shëndetësore të kafshëve në bashkëpunim të ngushtë me komunitetin blegtoral.