Interpol Tirana, në bashkëpunim me autoritetet spanjolle, ka realizuar ekstradimin nga Spanja në Shqipëri të shtetasit Sorel Cenaj, 25 vjeç, i cili ishte i shpallur në kërkim ndërkombëtar për veprat penale “tentativë vrasjeje”.

Sorel Cenaj ishte shpallur në kërkim nga Gjykata e Kukësit, e cila i kishte caktuar masën “arrest në burg” për veprat penale “Vrasja e kryer me kapërcim të kufijve të mbrojtjes së nevojshme”, mbetur në tentativë, si dhe “Prodhimi, mbajtja, blerja apo shitja pa leje e armëve të ftohta”.

Ai dyshohet se në vitin 2023, në një lokal në lagjen nr. 5 të qytetit të Kukësit, ka tentuar të vrasë një shtetas, duke e goditur atë me një mjet prerës.

Njoftimi zyrtar i Interpol Tiranës sqaron se operacioni policor ndërkombëtar, i koduar “The Wanted”, vijon me sukses, falë bashkëpunimit të ngushtë mes Interpol Tiranës dhe Interpol Madridit. Ky bashkëpunim ka mundësuar lokalizimin, kapjen dhe ekstradimin e shtetasve në kërkim ndërkombëtar.

Shtetasi Sorel Cenaj, 25 vjeç, është ekstraduar nga Spanja në Shqipëri dhe është vënë menjëherë në dispozicion të autoriteteve ligjzbatuese për veprimet e mëtejshme ligjore.

Interpol Tirana thekson se ky operacion është pjesë e angazhimit të vazhdueshëm për kapjen e personave të shpallur në kërkim, duke forcuar bashkëpunimin ndërkombëtar në luftën kundër krimit të organizuar dhe veprave penale të rënda.