Në Gjykatën Kundër Korrupsionit dhe Krimit të Organizuar do të dëgjohen 63 dëshmitarë në procesin gjyqësor për dosjen e njohur si “5D”. Prokuroria e Posaçme Kundër Korrupsionit dhe Krimit të Organizuar (SPAK) do të përdorë dëshmitarët për të zbardhur skemën e përfitimit të tenderave publikë, por edhe për të dokumentuar se si subjekti kishte pronarë faktikë dy ish-drejtorët e Bashkisë së Tiranës.

63 dëshmitarë janë kërkuar nga SPAK për të marrë pjesë në procesin gjyqësor ndaj ish-drejtorëve të Bashkisë së Tiranës, të cilët akuzohen se nëpërmjet kompanisë “5D Konstruksion” kanë fituar tendera për punë publike në konflikt të hapur interesi.

Në listën e dëshmitarëve janë punonjës të kompanisë “5D Konstruksion” si dhe Alfred Qato, vëllai i Mariglen Qatos.

Përmes këtyre dëshmitarëve, SPAK synon të zbulojë më në detaje mënyrën se si funksiononte skema e kompanisë, si dhe marrëdhëniet me Qaton dhe Mollën, që konsiderohen pronarë faktikë ndërkohë që ishin drejtorë në Bashkinë e Tiranës, në periudhën kur kryetar ishte Erjon Veliaj.

Një emër kyç për SPAK është edhe Eduard Meta, i cili më 22 janar 2016 ka themeluar kompaninë “Igor Elektrik”. Më pas, ai ia ka shitur 75 përqind të aksioneve Muhamet Petritit.

Në vitin 2019, subjekti ndryshoi emër duke u shndërruar në “VAS Construksion”, që më pas u kthye në “5D”.

Gjatë kësaj periudhe, kompania ka përfituar tendera nga Bashkia e Tiranës. Jonida Hoxha dhe Jona Bejko janë dy emrat kryesorë që SPAK i ka përfshirë në procesin gjyqësor ndaj ish-drejtorëve të Bashkisë.

Sekuestrimi dhe shqyrtimi i aparateve celularë ka zbuluar tendera të përfituar nga kompania 5D, si dhe biseda që kanë ngritur dyshime mbi një hotel që po ndërtohet në Durrës.

Pas dëshmive të tyre, SPAK do të thërrasë edhe pjesën tjetër të personave që do të dëshmojnë në këtë proces.

Pak javë më parë, Gjykata e Posaçme Kundër Korrupsionit dhe Krimit të Organizuar ka kundërshtuar kërkesën për gjykim të shkurtuar të ish-drejtorëve të Bashkisë së Tiranës.

Prokuroria pretendon se kompania “5D” ka përfituar në mënyrë të parregullt 12 tendera publikë gjatë viteve 2016-2020, duke shkelur rregullat e prokurimit dhe duke siguruar përfitime rreth 192 milionë lekë.