TIRANË – Gjykata e Tiranës ka dhënë dënimin maksimal me burgim të përjetshëm për Bledar Jambellin dhe Kristaq Lecin, të akuzuar si organizatorë të vrasjes së kryekomisarit Artan Cuku, ngjarje e ndodhur më 8 prill 2017 në rrugën e “Kosovarëve” në Tiranë.

Bledar Jambelli, i arrestuar në Greqi në vitin 2018 dhe më pas ekstraduar në Shqipëri, u konsiderua nga hetimet si porositësi dhe financuesi i krimit, ndërsa Kristaq Leci u identifikua si pjesë e grupit që ndihmoi në realizimin e atentatit.

Për zbardhjen e ngjarjes kyçe ishte dëshmia e Mikel Shallarit, autori ekzekutues i krimit, i cili pas arrestimit vetëm pak ditë pas vrasjes, vendosi të bashkëpunojë me Prokurorinë. Shallari tregoi në detaje marrëveshjen që kishte bërë me Jambellin dhe skemën e atentatit, duke përfituar statusin e bashkëpunëtorit të drejtësisë. Si rezultat, ai u dënua me vetëm 10 vite burgim, një dënim i reduktuar në këmbim të bashkëpunimit të tij.

Sipas dosjes hetimore, motive personale hakmarrjeje që lidhen me detyrën e Artan Cukut si drejtues policie, çuan në ekzekutimin e tij. Në vitin 2012, Cuku kishte urdhëruar arrestimin e Jambellit, i dyshuar për vrasjen e Armando Delajt, çështje për të cilën ky i fundit u lirua dy vite më vonë dhe madje mori dëmshpërblim nga shteti shqiptar prej 500 mijë lekësh për burgosje të padrejtë.

Vendimi i Gjykatës së Tiranës mbyll një nga dosjet më të bujshme të atentateve kriminale ndaj zyrtarëve të lartë të rendit, me një mesazh të qartë se bashkëpunimi me drejtësinë mund të çojë drejt zbardhjes së krimeve më të rënda në vend.