Aktorja amerikane Tori Spelling, e njohur për rolin e saj në serialin e famshëm “Beverly Hills 90210”, është përballë një sfide të madhe financiare. Një borxh i papaguar prej më shumë se një dekade ndaj një banke në Los Angeles është rritur në një shumë marramendëse, që arrin në 350 mijë euro.

Sipas dokumenteve gjyqësore të depozituara javën e kaluar, Banka Kombëtare e Qytetit ka kërkuar rinovimin e një vendimi gjykate për një hua të dhënë në vitin 2012 për Spelling dhe ish-bashkëshortin e saj, aktorin Dean McDermott. Huaja fillestare ishte 200 mijë euro, por pas më shumë se dhjetë vitesh mospagese dhe akumulimi të interesave, shuma totale ka arritur në 350 mijë euro.

Banka ka ngritur për herë të parë padi ndaj çiftit në vitin 2016, kur borxhi kishte arritur në 188,803.38 euro. Në vitin 2019, një vendim gjyqësor detyroi Spelling të paguante 219,796.66 euro dhe McDermott 202,066.10 euro, por as atëherë nuk u krye shlyerja e detyrimeve.

Në mocionin e fundit, vetëm emri i Tori Spelling figuron si debitor, duke ngritur pikëpyetje nëse Dean McDermott ka ende përgjegjësi financiare për këtë borxh, sidomos pas ndarjes së tyre në qershor të vitit 2023, që i dha fund një martese 17-vjeçare. Çifti ka pesë fëmijë së bashku.

Situata financiare e Spelling ka qenë shpeshherë në qendër të vëmendjes, me lajme të shpeshta mbi vështirësi ekonomike dhe mosmarrëveshje ligjore. Ky zhvillim i fundit e shton presionin publik mbi aktoren, e cila po përpiqet të rindërtojë jetën e saj pas divorcit.

Gjykata pritet të shqyrtojë kërkesën për rinovim të vendimit në javët në vijim.