Pas sulmeve të koordinuara amerikano-izraelite ndaj tri centraleve bërthamore të Iranit – Fordow, Isfahan dhe Natanz – Agjencia Ndërkombëtare e Energjisë Atomike (IAEA) ka deklaruar se nuk ka të dhëna për rritje të niveleve të rrezatimit jashtë këtyre impianteve.
“IAEA mund të konfirmojë se deri në këtë kohë nuk është raportuar asnjë rritje e niveleve të rrezatimit jashtë centralit,” thuhet në një njoftim të publikuar në rrjetet sociale nga vetë agjencia.
Ky komunikim vjen në një moment kur shqetësimet globale për ndonjë ndotje radioaktive janë në rritje, pas njoftimit të Presidentit amerikan Donald Trump se forcat ajrore amerikane kanë goditur tri objektet kryesore bërthamore të Iranit me qëllim çmontimin e kapaciteteve të tij për pasurim të uraniumit.
IAEA nënvizoi se është në pritje të më shumë informacione dhe do të ofrojë vlerësime të mëtejshme mbi situatën sapo të ketë të dhëna të verifikuara nga terreni.
Deklarata e agjencisë ndërkombëtare synon të qetësojë opinionin ndërkombëtar, ndërsa tensionet mes SHBA-së, Izraelit dhe Iranit kanë arritur pikën më kritike të dekadës, duke ngritur frikën për një përshkallëzim me pasoja të pakontrollueshme jo vetëm për Lindjen e Mesme, por për sigurinë bërthamore globale.
