Modelja, autorja dhe nëna e një djali, Emily Ratajkowski, ka folur hapur për ndryshimet rrënjësore në stilin e jetës pas lindjes së të birit dhe mënyrën si i kundërvihet pritshmërive që shoqëria i vendos grave – veçanërisht nënave. Në një intervistë të fundit të cituar nga mediat ndërkombëtare, ajo shpalos bindjet e saj të reja mbi mëmësinë, feminitetin dhe marrëdhënien me burrat.

“Nuk mund të vesh më taka si më parë, sepse tani shkolla e djalit është shumë afër,” tha ajo me humor, duke shtuar se dikur, në qytet, e çonte vetë djalin në kopsht dhe shkonte drejt e në punë. Në atë kohë, si producente e një podkasti të saj që edhe filmohej, ajo kujdesej për pamjen e jashtme dhe vishej më elegante.

Por për Emily, veshja nuk ishte thjesht një zgjedhje estetike. Ishte një qëndrim. Një akt i qëllimshëm.

“Oh, isha padyshim më e kuruar në veshje krahasuar me prindërit e tjerë. Mendoj se kjo është një nga mënyrat e mia për të qenë pak ‘subversive’ në mëmësinë time. Shoqëria na tregon çdo ditë si duhet të duket një nënë – por kush e përcakton këtë?” pyet ajo.

Autorja e librit të suksesshëm “Trupi Im”, Ratajkowski u bë nënë më 8 mars 2021, me lindjen e djalit Sylvester Apollo Bear, fryt i martesës me producentin Sebastian Bear-McClard, nga i cili u divorcua në vitin 2022. Sot, ajo e shikon veten më të qartë dhe më të vendosur në kufijtë dhe prioritetet që vendos.

“Të mos përqendrohesh te burrat është vërtet mirë,” deklaroi ajo me bindje. “Në këtë botë, burrat kanë marrë kontrollin, por unë kam zbuluar diçka më të vlefshme: komunitetin. Më pëlqejnë ende burrat, por nuk kam asnjë burrë heteroseksual në jetën time – përveç kur ka interes romantik. Ata janë argëtues, por nuk janë pjesë e thelbit tim.”

Sot, në qendër të botës së Emily-t janë gratë, komuniteti queer dhe të qenit nënë – jo më figura mashkullore si domosdoshmëri sociale. Me stilin e saj sfidues, qasjen e drejtpërdrejtë dhe mendimin e pavarur, ajo vazhdon të jetë një zë i rëndësishëm për feminizmin modern dhe prindërimin përtej stereotipeve.