Tel Aviv, 23 qershor 2025 – Policia izraelite ka arrestuar tre banorë të qytetit Bat Yam, pranë Tel Avivit, pasi ndaluan hyrjen e qytetarëve në strehimore gjatë sulmeve me raketa nga Irani, duke rrezikuar jetën e tyre në një moment emergjence.
Një nga të arrestuarit akuzohet se i mohoi hyrjen në një strehë një gruaje dhe prindërve të saj të moshuar, me arsyetimin se ata nuk banonin në ndërtesën ku ndodhej strehimorja. Ngjarja ka shkaktuar reagime të ashpra në opinionin publik izraelit, sidomos në rrjetet sociale.
Në një tjetër incident të rëndë, një burrë sulmoi fizikisht një grua e cila po përpiqej të hynte në një strehë publike me qenin dhe macen e saj më 14 qershor. Gruaja, e cila pësoi thyerje të hundës, ka paditur burrin dhe djalin e tij për dhunë fizike.
Ligji izraelit e ndalon rreptësisht pengimin e hyrjes në strehimore publike, duke e konsideruar një vepër penale të dënueshme me deri në një vit burg ose gjobë.
Incidentet në rritje pas shpërthimit të konfliktit
Këto nuk janë rastet e vetme. Prej shpërthimit të luftës me Iranin 11 ditë më parë, dhjetëra raportime të ngjashme janë regjistruar në mbarë vendin.
Një banore e Haifës deklaroi se iu mohua hyrja në një strehë publike në një lagje me shumicë Haredi (ultra-ortodokse), teksa po ndiqte një turmë që vraponte për strehim. Një banor ia mbylli derën në fytyrë, ndërsa sirenat paralajmëruese të sulmit ajror binin.
Ndërkohë, në Petah Tikva, një tjetër qytet izraelit, policia arrestoi një banor që u kap në video duke ndaluar njerëz të hyjnë në një strehë, ndërsa ishte i veshur me një kostum të rremë sherifi, me jelek dhe kapelë bejsbolli.
Reagime dhe masa
Autoritetet izraelite kanë paralajmëruar se do të veprojnë pa tolerancë ndaj çdokujt që rrezikon jetën e qytetarëve gjatë kohës së alarmit civil, duke bërë thirrje për solidaritet dhe përgjegjësi në situata të rënda sigurie.
Ministria e Sigurisë së Brendshme ka nisur një fushatë informuese për të sqaruar se çdo strehë publike është e hapur për të gjithë, pa dallim të adresës së banimit, dhe asnjë individ nuk ka të drejtë të kufizojë aksesin në këto hapësira shpëtimi.
