Pas javësh spekulimesh për një lidhje të re, duket se këngëtari Adrian Gaxha ka zgjedhur të mos hapë një kapitull të ri, por të rikthehet aty ku e kishte lënë – tek një dashuri e vjetër.

Gaxha është fotografuar së fundmi duke pushuar në jug të Shqipërisë në shoqërinë e një vajze misterioze. Por burime pranë tij konfirmojnë se bëhet fjalë për ish-Missin Sidorela Dauti, me të cilën ai ka pasur një histori të ndërlikuar dashurie ndër vite.

Romanca mes tyre ka qenë shpesh në vëmendje të medias rozë, për shkak të ndarjeve dhe ribashkimeve të përsëritura. Tani duket se çifti ka vendosur të japë një tjetër shans marrëdhënies së tyre, duke mos i vënë pikë kësaj historie që, siç duket, nuk ka përfunduar ende.

As Gaxha dhe as Dauti nuk kanë reaguar publikisht, por zërat për një ribashkim serioz po forcohen gjithnjë e më shumë. Fansat janë në pritje: a do ta konfirmojnë këtë herë zyrtarisht?