Moska i ka përcjellë një mesazh të qartë Beogradit në lidhje me eksportet e armëve drejt Ukrainës, duke deklaruar se e beson deklaratën e Presidentit serb Aleksandër Vuçiç për pezullimin e tyre, por do të kontrollojë zbatimin në praktikë.

Në një deklaratë për mediat, shefi i Shërbimit të Inteligjencës së Jashtme të Rusisë, Sergei Naryshkin, theksoi:

“Presidenti Vuçiç ka deklaruar se Serbia ose i ka ndaluar tashmë, ose do të ndalojë eksportet e armëve. Por këtë do ta verifikojmë.”

Deklarata vjen disa ditë pas akuzave të inteligjencës ruse se Serbia po përdor rrugë të tërthorta për të eksportuar pajisje ushtarake drejt Ukrainës, duke përfshirë montimin e pjesëve të municioneve në Çeki dhe Bullgari.

Sipas një njoftimi të Shërbimit të Inteligjencës së Jashtme të Rusisë (SVR) të datës 23 qershor, dërgesat serbe po rriten, ndërsa prodhuesit serbë “janë të vetëdijshëm” se ku përfundojnë produktet e tyre:

“Ata e dinë që raketat dhe predhat e tyre përdoren për të vrarë ushtarë rusë.”

Këto akuza komplikojnë më tej balancën gjeopolitike të Serbisë, një vend që përpiqet të mbajë marrëdhënie të mira me Moskën, ndërsa njëkohësisht ndjek rrugën e integrimit në Bashkimin Evropian.

Reagimi i Kremlinit sinjalizon shqetësim të shtuar për rolin e vendeve të Ballkanit në konfliktin ruso-ukrainas, në një moment kur Perëndimi po intensifikon ndihmën ushtarake për Kievin. Ndërkohë, zyrtarisht, Serbia ka deklaruar neutralitet ushtarak dhe ka mohuar çdo furnizim të drejtpërdrejtë me armë për Ukrainën.