TIRANË – Dy nga zërat më të njohur të ekranit shqiptar, Fatma Haxhialiu dhe Aulona Musta, kanë ngritur zërin për mënyrën se si televizioni publik shqiptar përzgjedh moderatorët e tij. Të ftuara në një intervistë në “Andale”, së bashku me producenten Dalina Buzi, ato sollën në vëmendje rastin konkret të Beniada Nishanit, e cila aktualisht prezanton një emision pasditeje në Radio Televizionin Shqiptar.

Duke folur për evoluimin e medias dhe nivelin e përfaqësimit në ekran, Haxhialiu dhe Musta theksuan se nuk kanë asnjë qëndrim personal ndaj Beniadës, por se janë kundër mënyrës së rekrutimit në një institucion publik si TVSH.

“Nuk është problem Beniada si njeri, por zgjedhja që është bërë për një program që kërkon zotërim të gjuhës shqipe, përballje me temat e përditshme, dhe komunikim efektiv me publikun,” – u shprehën ato.

Sipas tyre, një person që ka jetuar gjatë jashtë Shqipërisë dhe që e ka shqipen të cunguar, nuk mund të jetë zëri që përfaqëson një televizion kombëtar. Kritikat nuk u ndalën tek figura e moderatores, por më shumë ndaj drejtuesve të televizionit publik, të cilët – sipas tyre – nuk ndjekin kritere profesionale kur bëhet fjalë për pozicione publike të rëndësishme në media.

“Ne nuk mund të tolerojmë më improvizime në ekranin publik, aq më tepër kur bëhet fjalë për figura që i flasin çdo pasdite qytetarëve shqiptarë në emër të një institucioni të paguar nga taksat e tyre,” – thanë më tej dy moderatoret.

Kjo deklaratë ka ngjallur diskutime të shumta në rrjet, ku një pjesë e publikut u ka dhënë të drejtë gazetareve për theksimin e nevojës për profesionalizëm në ekran, ndërsa të tjerë e kanë cilësuar si një sulm të padrejtë ndaj një vajze që “po përpiqet të bëjë karrierë në Shqipëri”.

Nga ana e saj, Beniada Nishani nuk ka reaguar ende lidhur me këtë debat.