Procesi i rinumërimit të votave për qarkun e Tiranës po shkon drejt përfundimit, ndërsa të dhënat paraprake tregojnë se shpërndarja e mandateve nuk ka pësuar asnjë ndryshim, si për subjektet politike, ashtu edhe për kandidatët individualë në listat parapëlqyese, të njohura si listat e hapura.

Deri në orët e fundit janë rinumëruar 961 qendra votimi, por në vend që të përfitojë, Partia Demokratike, e cila ishte iniciatorja e këtij procesi, ka dalë më e dëmtuara.

Sipas burimeve nga Komisioni i Ankimimeve, PD ka humbur deri tani 524 vota, ndërkohë që Partia Socialiste ka humbur 339 vota nga rinumërimi. Humbje janë evidentuar edhe për Partinë Mundësia, megjithatë kjo e fundit nuk rrezikon mandatin e dytë në qarkun e Tiranës.

Gazetari Ervin Kello raportoi nga vendngjarja se sot pritet përmbyllja e plotë e procesit për Bashkinë e Tiranës, për të kaluar më pas në Kavajë dhe Rrogozhinë, dy bashki të tjera që janë pjesë e qarkut Tiranë.

Nëse ritmi aktual vijon, Komisioni Qendror i Zgjedhjeve parashikon që gjithë rinumërimi për qarkun të mbyllet brenda pak ditësh, pa pritur ndonjë ndryshim në balancën politike që prodhoi 11 maji.

Në përfundim, ky proces duket se ka shërbyer më shumë për konfirmimin e rezultatit fillestar, sesa për përmbysje apo korrigjime të ndjeshme.