TIRANË – Kreu i Partisë Demokratike, Sali Berisha, ka ngritur akuza të forta në drejtim të mazhorancës gjatë seancës plenare të së enjtes, lidhur me procesin e zgjatjes së zgjedhjes së Avokatit të Popullit, një institucion i rëndësishëm që prej një viti është pa drejtues.

Sipas Berishës, qeveria po pengon me qëllim votimin, duke refuzuar në mënyrë të pajustifikuar kandidaturën e propozuar nga opozita, konkretisht z. Simon Ndregjoni, për shkak të së kaluarës së tij si i përndjekur politik.

“Problemi i Avokatit të Popullit shtyhet prej një viti sepse ju nuk pranoni kandidaturën e opozitës, edhe pse ai plotëson çdo kriter dhe është dinjitoz për atë detyrë,” tha Berisha, duke theksuar se “rregulli ka qenë gjithmonë që propozimi i vjen nga opozita”.

Berisha foli për një përjashtim të padrejtë dhe të paarsyetuar të kandidatit opozitar, duke e konsideruar këtë një shkelje të traditës parlamentare dhe një sinjal të qartë të mungesës së vullnetit politik për bashkëpunim institucional.

Ai nuk i kurseu as tonet ironike ndaj kryeministrit, të cilin e quajti “Ramaduro”, duke e krahasuar me figura autoritare të së shkuarës. Sipas tij, kjo situatë është “dëshmi e zgjimit të demonëve të sistemit të vjetër” dhe refuzimi për të pranuar një përfaqësues të shtresës së të persekutuarve politikë është një akt politikisht i turpshëm.

“Nuk pranoni z. Ndregjoni vetëm sepse ka vite persekutimi dhe burgosjeje politike. Ky është përjashtim politik dhe antikushtetues,” deklaroi ai.

Në fund të fjalës së tij, Berisha i bëri thirrje mazhorancës që të çojë menjëherë për votim kandidaturën e propozuar nga opozita, duke e konsideruar të papranueshme vonesën e mëtejshme në funksionimin e një institucioni të pavarur dhe jetik për mbrojtjen e të drejtave të qytetarëve.