Turqi – Një ngjarje tronditëse ka tronditur opinionin publik në Turqi. Një 18-vjeçare, Oya Budak, u vra me armë zjarri nga i fejuari i saj, vetëm pak kohë pasi ky i fundit mësoi se ajo ishte përdhunuar dhe kishte mbetur shtatzënë.

Ngjarja tragjike ndodhi të enjten në mbrëmje. Sipas mediave vendase, 19-vjeçari Samet A. e telefonoi Oyan dhe i kërkoi të takoheshin. Vajza pranoi, por në takim u shoqërua nga vëllai i saj vetëm 13 vjeç. Në momentin që u takuan, i riu nxori armën dhe qëlloi të fejuarën e tij në gjoks dhe në kokë, duke e lënë të pajetë në vend.

E reja, e cila sipas raportimeve ishte pesë muajshe shtatzënë, u transportua me urgjencë në spital, ku iu nënshtrua një ndërhyrjeje kirurgjikale. Për fat të keq, mjekët nuk arritën ta shpëtonin as vajzën, as foshnjën e saj.

Qytetarët e zonës që dëgjuan të shtënat lajmëruan menjëherë policinë. Pas një ndjekjeje të shpejtë, autori i krimit u arrestua në shtëpinë e xhaxhait të tij.

Gjithashtu, është ndaluar edhe personi që dyshohet se ka abuzuar seksualisht me Oya Budak, i cili është vendosur në pranga dhe ndodhet në paraburgim.

Kur u shoqërua në prokurori, autori i vrasjes refuzoi të tregonte pendesë. I pyetur nga një gazetar për arsyen e krimit, ai u përgjigj me fjalët tronditëse: “Nuk pendohem, largohu!”.

Ngjarja ka hapur një debat të gjerë në rrjetet sociale dhe në media për çështjet e dhunës ndaj grave, “krimeve të nderit” dhe mungesës së sigurisë për viktimat e dhunës seksuale në Turqi. Autoritetet janë duke vijuar hetimet për zbardhjen e plotë të rrethanave.