VENECIA – Legjenda e NFL-së, Tom Brady, dhe aktorja e njohur Sydney Sweeney janë vënë në qendër të vëmendjes pas një nate të gjatë vallëzimi në dasmën luksoze të Jeff Bezos dhe Lauren Sanchez në Venecia. Sipas burimeve të pranishme në eventin ekskluziv, dyshja kanë qëndruar pranë njëri-tjetrit gjatë gjithë mbrëmjes dhe janë parë duke kërcyer deri në orët e para të mëngjesit.

Të nesërmen, paparacët i kanë kapur sërish së bashku, këtë herë në një shëtitje të qetë në rrugët piktoreske të qytetit, të shoqëruar nga aktori Orlando Bloom. Në fotot e publikuara, vërehet një kimi e qartë mes Brady-t, 46 vjeç, dhe aktores 27-vjeçare, e cila pak kohë më parë është ndarë nga i fejuari i saj, producenti Jonathan Davino.

Ndërkohë që nuk ka ende një deklaratë zyrtare nga asnjëri prej tyre, afërsia e hapur në publik ka ndezur thashethemet në rrjetet sociale, duke nxitur komente që variojnë nga kureshtja për një romancë të mundshme, deri te ironia për diferencën në moshë dhe stil jetese.

Nëse lidhja merr konfirmim zyrtar, pritet që kjo dyshe e papritur të jetë në qendër të medias rozë gjatë gjithë verës — një kombinim i sportit dhe Hollywood-it që s’mund të kalojë pa u komentuar. Për momentin, fansat janë në pritje të lëvizjes së radhës.