Një ngjarje e pakëndshme është regjistruar mesditën e së hënës në rrugën “Sazani” në qytetin e Vlorës, ku një shtetase e huaj ka mbetur e lënduar pas një aksidenti rrugor.

Sipas të dhënave paraprake nga policia, një 47-vjeçar, duke drejtuar një mjet tip furgon, ka aksidentuar një 19-vjeçare me shtetësi ukrainase. E reja ka pësuar dëmtime të lehta dhe po trajtohet në spital jashtë rrezikut për jetën.

🚨 Drejtuesi i automjetit është shoqëruar në komisariatin e Vlorës, ku po merret në pyetje dhe po kryhen veprimet e nevojshme procedurale.

Grupi hetimor ndodhet në vendngjarje dhe po punon për sqarimin e plotë të rrethanave të aksidentit, si dhe për përcaktimin e shkakut të përplasjes.

Policia u bën thirrje drejtuesve të mjeteve të tregojnë kujdes dhe vëmendje të shtuar, sidomos në zonat urbane me prani turistësh dhe këmbësorësh.