Durrës, 30 qershor – Një zjarr ka përfshirë pasditen e djeshme tregun ambulant në zonën e plazhit të Durrësit, duke shkaktuar panik mes pushuesve dhe tregtarëve. Fatmirësisht, nuk raportohet për të lënduar, por janë shkaktuar dëme materiale.

Sipas burimeve zyrtare, pronari i tregut është proceduar në gjendje të lirë, pasi dyshohet se ka shkelur rregullat e mbrojtjes në punë. Zjarri ka zbuluar mangësi serioze në kushtet teknike të tregut dhe mungesën e masave bazë të sigurisë.

Prefekti i qarkut Durrës, Emiljano Jani, deklaroi se dyshimet paraprake flasin për një shkëndijë elektrike si shkak të zjarrit, për shkak të instalimeve jo të standardizuara dhe infrastrukturës së përkohshme që përdoret në treg.

“Strukturat përkatëse janë në terren për të verifikuar shkaqet dhe për të marrë masat për të parandaluar përsëritjen e ngjarjeve të tilla,” tha Jani, duke theksuar nevojën për kontrolle më të rrepta në tregjet sezonale, të cilat përballen me fluks të lartë gjatë sezonit turistik.

Hetimet për ngjarjen vijojnë, ndërsa autoritetet kanë bërë apel për respektimin e standardeve të sigurisë në vendet publike me prani të shtuar qytetarësh.