Ciudad Juarez, 30 qershor – Një zbulim makabër ka tronditur qytetin verior meksikan të Ciudad Juarez, ku 381 trupa të pajetë janë gjetur të braktisur në mënyrë të papërshtatshme në ambientet e një krematoriumi privat. Lajmi është konfirmuar nga zyra e prokurorit të shtetit Chihuahua, e cila fajëson institucionin funerale për neglizhencë të rëndë dhe shkelje të rëndë të etikës profesionale.

“Trupat ishin lënë në mënyrë të papërshtatshme në ambiente të ndryshme të ndërtesës. Disa ishin grumbulluar në dysheme, një mbi tjetrin, pa asnjë rend apo kujdes,” deklaroi për AFP zëdhënësi Eloy Garcia, duke përshkruar një skenë të ngjashme me një shtëpi tmerri.

Sipas autoriteteve, të gjithë trupat ishin balsamosur dhe kishin certifikata vdekjeje, çka tregon se ishin pranuar për kremim në përputhje me dokumentacionin përkatës. Megjithatë, disa prej tyre dyshohet se kanë qëndruar të braktisur për më shumë se dy vjet, në kundërshtim me çdo normë ligjore dhe humane.

Zyra e prokurorisë ka nisur një proces hetimor penal ndaj pronarëve dhe drejtuesve të krematoriumit. Një nga menaxherët është paraqitur tashmë para drejtësisë, ndërsa autoritetet kërkojnë ngritjen e akuzave penale për ata që rezultojnë përgjegjës për situatën.

“Bëhet fjalë për një akt të papërgjegjshmërisë ekstreme, që shkel jo vetëm ligjin, por edhe dinjitetin njerëzor,” theksoi Garcia.

Rasti ka ngjallur zemërim dhe shqetësim të thellë në opinionin publik meksikan, duke rihapur debatet për mungesën e kontrollit dhe rregullimit të sektorit privat funerale në vend.