Xhenovë, Itali – Njësia operative e karabinierëve në Xhenovë finalizoi një operacion të suksesshëm duke sekuestruar rreth 5 kilogramë kokainë dhe 22 kilogramë kanabis në shtëpinë e një 30-vjeçari shqiptar.

Ngjarja nisi kur karabinierët vunë re lëvizjet e dyshimta të 30-vjeçarit, i cili drejtonte një automjet duke shikuar shpesh përreth, një sjellje që tërhoqi vëmendjen e forcave të rendit. Pas një vëzhgimi të gjatë dhe ndjekjeje, ata arritën të identifikonin banesën e tij në qytetin e Vigevanos.

Pas orësh pritjeje, shqiptari u ndalua teksa po dilte nga apartamenti dhe iu gjet në posedim një pako me 58 gramë kokainë. Kontrolli më i detajuar i banesës zbuloi rreth 5 kilogramë kokainë të fshehur në pjesë të ndryshme të shtëpisë, përfshirë midis jastëkëve të divanit dhe nën tavolinën e kuzhinës. Tre blloqet kryesore të kokainës ishin ende të paprekura, ndërsa pjesa tjetër ishte e ndarë në qese me peshë të ndryshme, gati për shitje me shumicë.

Karabinierët vunë re se disa blloqe të kokainës kishin në sipërfaqe imazhin e Al Pacinos në filmin “Scarface”, ndërsa të tjera ishin të vulosura me nxehtësi.

Në frigoriferin e kuzhinës u gjetën dhe 22 kilogramë hashash të ndarë në 122 blloqe. Përveç drogave, u sekuestruan edhe 7,000 euro në para të gatshme dhe materiale të ndryshme për paketimin.