Washington, SHBA – Hugo Carvajal, ish-kreu i inteligjencës ushtarake të Venezuelës, i njohur me nofkën “El Pollo”, ka pranuar fajësinë për akuzat e trafikut të drogës dhe narko-terrorizmit në Shtetet e Bashkuara.
Carvajal, i cili ishte një nga figurat kyçe të Kartelit të Diellit, një rrjet i përfshirë në trafik droge me lidhje me zyrtarë të lartë ushtarakë venezuelianë, akuzohet për ndihmën e dhënë rebelëve kolumbianë të FARC në sigurimin e armëve dhe mbrojtjen e dërgesave të kokainës drejt SHBA-së.
Ish-besnik i ish-presidentit Hugo Chávez dhe një nga njerëzit më të afërt të regjimit të Nicolás Maduro, Carvajal u arrestua në Spanjë pas disa vitesh arratie dhe u ekstradua në Shtetet e Bashkuara.
Pranimi i fajësisë ngre dyshime për një marrëveshje të mundshme me autoritetet amerikane, ku ai mund të përfitojë një dënim më të lehtë në këmbim të bashkëpunimit dhe ndarjes së informacionit për regjimin e Maduro-s.
SHBA-ja ka akuzuar presidentin Maduro për narko-terrorizëm që nga viti 2020, ndërsa arrestimi dhe pranimi i fajësisë së Carvajalit përbëjnë një tjetër goditje të rëndësishme në përpjekjet ndërkombëtare kundër trafikut të drogës në Amerikën Latine.
