Prej më shumë se dy javësh, 30-vjeçari Eraldo Muça rezulton i zhdukur në rrethana të pazbuluara, duke shtuar frikën e një ngjarjeje kriminale. Ai është parë për herë të fundit në autostradën Durrës-Tiranë, pasi më parë kishte ndaluar në fermën e familjes Sadikaj në Memaliaj.

Familjarët e tij kanë ngritur dyshime të forta se pas zhdukjes mund të fshihet një hakmarrje e organizuar, e ndërlidhur me atentatin me tritol ndaj Aleksandër Sadikajt, i vrarë në vitin 2022 – një prej miqve më të ngushtë të Eraldos.

Burime nga policia bëjnë të ditur se janë duke u hetuar disa pista, përfshirë edhe atë të larjes së hesapeve mes grupeve kriminale, ndërsa aktualisht nuk ka asnjë gjurmë të vendndodhjes së 30-vjeçarit.

Familja e tij apelon për ndihmë nga institucionet dhe qytetarët që mund të kenë informacion rreth lëvizjeve të fundit të Eraldos, ndërkohë që hetimet vazhdojnë në kushte të rrepta konfidencialiteti.