Kryetarja e Kuvendit, Elisa Spiropali, zhvilloi sot një vizitë në Katedralen “Ngjallja e Krishtit” në Tiranë, ku u prit nga Fortlumturia e Tij, Kryepeshkopi i Tiranës, Durrësit dhe gjithë Shqipërisë, Imzot Joan Pelushi.

Gjatë takimit, Spiropali përcolli urimet e saj për udhëheqjen e Kishës Ortodokse Autoqefale të Shqipërisë dhe për gjithë besimtarët ortodoksë, duke vlerësuar kontributin shpirtëror të Kryepeshkopit Joan në jetën publike dhe fetare të vendit.

“Drita e Perëndisë, kthjelltësia hyjnore dhe urtësia e Fortlumturisë së Tij, Joan, na frymëzojnë për të fuqizuar përmasën shpirtërore në punët dhe detyrat tona të përditshme, si qytetarë, shërbyes publikë dhe politikanë”, u shpreh Kryetarja e Kuvendit.

Kryepeshkopi Joan Pelushi u fronëzua më 29 mars 2025 në një ceremoni solemne në katedrale, duke shënuar herën e parë në historinë e Kishës Ortodokse Shqiptare që një shqiptar ulet në fronin më të lartë kishtar.

Vizita e Spiropalit vjen në vazhdën e takimeve institucionale dhe ndërfetare, që synojnë forcimin e harmonisë fetare dhe bashkëpunimit mes institucioneve dhe komuniteteve fetare në vend.