Startup-i i ri i inteligjencës artificiale Thinking Machines Lab, i themeluar nga Mira Murati, ish-drejtoresha e teknologjisë në OpenAI, po bëhet qendër e vëmendjes në Silicon Valley – dhe jo për ndonjë produkt të ri, por për pagat rekord që po ofron.

Sipas një raporti të Business Insider, kompania e Muratit, e themeluar në fillim të vitit 2025, u paguan disa anëtarëve të ekipit teknik deri në 500,000 dollarë në vit, pa llogaritur shpërblimet dhe bonuset që zakonisht e shtojnë ndjeshëm këtë shumë. Këto të dhëna burojnë nga dokumentet federale për vizat H-1B – një burim i rrallë dhe transparent për të kuptuar se sa po paguhen specialistët në industrinë teknologjike amerikane.

Shembuj konkretë nga dosjet përfshijnë:
• Një inxhinier AI me pagë prej 500,000 dollarë në vit.
• Dy anëtarë të tjerë teknikë me 450,000 dollarë secili.
• Një bashkëthemelues i listuar si specialist i mësimit automatik me 450,000 dollarë.

Këto shifra nuk përfshijnë aksionet (equity), të cilat në startup-et me vlerësim miliarda dollarësh mund të rezultojnë edhe më fitimprurëse.

Kompania e Muratit ka mbledhur 2 miliardë dollarë në financim, me një vlerësim prej 10 miliardë dollarësh, pavarësisht se ende nuk ka hedhur në treg ndonjë produkt. Kjo tregon besimin e madh të investitorëve në vizionin e saj – një vizion që buron nga eksperienca e saj direkte në zhvillimin e ChatGPT dhe projekteve të tjera të avancuara në OpenAI.

Për shumë analistë, strategjia e Thinking Machines është e qartë: të ndërtojë një ekip elitar të nivelit më të lartë në botë, përpara se të shpallë publikisht produktin që synon të garojë me gjigantët si OpenAI, Anthropic apo xAI e Elon Musk.

Ndërkohë, tregu i punës në fushën e inteligjencës artificiale vazhdon të nxehet, dhe Thinking Machines Lab po jep sinjalin se lufta për talentin më të mirë vetëm sa ka filluar.