Kryeministri Edi Rama ka vendosur të bëjë ndryshime në kryesinë e Partisë Socialiste në Vlorë, duke komanduar emra të rinj në drejtim të degës lokale.

Admir Malaj dhe Vilma Bello nuk do të vijojnë më në rolin e bashkëkryetarëve të PS-së në këtë qark, ndërsa Klevis Kaso është komanduar si kryetar i ri, me Erjona Ismailin si bashkëkryetare.

Ky ristrukturim vjen në kuadër të procesit të reformimit dhe rifreskimit të organizatave socialiste, të paralajmëruar më herët nga kreu i qeverisë dhe njëherazi lider i PS-së, me qëllim rigjallërimin e partisë në bazë dhe forcimin e strukturave lokale në prag të sfidave të ardhshme elektorale.

Lëvizja në Vlorë konsiderohet si pjesë e një valë më të gjerë ndryshimesh, që mund të përfshijë edhe qarqe të tjera në vijim.